XX. mendeko Euskararen Corpus estatistikoa

Testuingurua

Karrantza herrigunetik irten eta bi kilometrotara, Ambasaguaseko bidegurutzean, berriro C-6210 hartuko dugu, bertatik zehar aurreko ibilaldian egin genuen bide bera alderantziz egiteko.

Horrela, Turtzioz-Billaberde zeharkatuz Artzentales bailaran dagoen Traslaviñara joko dugu, ezkerretara eginaz, Goritza ibaiaren bazterretik Sopuerta harrapatu arte.

Aintzinako herria dugu Sopuerta ere, izen horrekin agertzen baitzaigu jadanik XIII. mendean; bere gunean Mercadillo auzoa eta Udaletxea aipatu behar, baina ezaguna egiten duena benetan, Abellaneda auzoan aurkitzen den eta aurreko etapan aipatu dugun Batzar Etxea da.

Ez dugu beraz hortaz berriro hitzik egingo.

Sopuertatik aurrera, zortzi kilometrotara Santelices auzotik gora zuzenean La Arboledara.

Joan den mendearen hondarretan eta XX.aren hasieran Bizkaiak ezagutu zuen meatzaritzaren beroaldi neurrigabeak erakarrita alde hauetara hurbildu ziren gizonen bizimodu eta lanaren lekukotasuna darie paisaia eta etxebizitzei.

Benetan paisaia berezia hemen aurkitzen dena; hortaz gain gure oraintsuko historiaren garrantzizko lekuko bat ere ba dugu La Arboleda.

Orain dela gutxi, Bizkaiko Foru Aldundiak, lurralde honek duen garrantzi hori kontutan izanik, bereganatzea erabaki du, proiektu bereziren baten babespean jartzekotan edo. Hala biz.

La Arboledatik bi kilometrotara Larraineta.

Hona heltzen da Trapagaranetik datorren funikularra, baina gu zuzenean barik, bide bihurgunetsu batetan behera abiatuko gara herri hortaraino jaisteko.

Bertan N-634 bide nagusiarekin topo egitean, ezkerretara Urtuellarantz hartuko dugu.

Herri hortatik pasatzean eta bide ertzean, goratxoago aipatu dugun meatzaritza lanari eskainitako oroigarri bakarretariko bat.

Oinarri haundi baten gainean, meatzal orga bat; bere oinetan, albo batean, eskaintza labur hau: .

Bide nagusitik aurrera jarraituko dugu, Barbadun ibaia aurkitzean Somorrostrora heldu garela konturatu arte.

Lehenengo aurkitzen duguna Muñatones gazteluak, ermitak eta jauregiak osatzen duten XIII. mendeko multzo interesgarria da.